Амбасада ЗША ў Беларусі выступіла з заявай у сувязі з чарговым актам вандалізму ў Курапатах

05.02.2007.

"Амбасада шкадуе, што зноў была пашкоджаная мэмарыяльная лаўка — падарунак беларускаму народу ад народу Злучаных Штатаў. Аднак яшчэ большую занепакоенасьць выклікае тое, што гэты акт вандалізму зьневажае памяць тысячаў ахвяраў сталінізму ў Курапатах. Амбасада зьбіраецца і надалей ушаноўваць памяць тых, хто загінуў у Курапатах, і разглядае шэраг варыянтаў аднаўленьня мэмарыяльнай лаўкі”, - запісана ў заяве.

У прэсавых службах Міністэрства ўнутраных справаў, гарадзкой і абласной міліцыі Радыё Свабода паведамілі, што ў міліцэйскіх зводках пра вандалізм у Курапатах не паведамляецца. "Пра факт вандалізму я сам даведаўся з інтэрнэту,” - сказаў кіраўнік прэсавай службы міліцыі Менскай вобласьці Аляксандар Шункевіч.

Дасьледчык гісторыі сталінскіх рэпрэсіяў Ігар Кузьняцоў неаднаразова зьвяртаўся ў міліцыю з прычыны фактаў вандалізму ў Курапатах, аднак ён больш ня верыць у плённасьць гэткіх захадаў: “Калі 30 студзеня мы былі ў Курапатах, то ўсю інфармацыю перадалі другому сакратару амбасады ЗША. Чарговы зварот у міліцыю нічога ня дасьць. Павінна быць заява да імя амбасады, нота пратэсту ў МЗС, потым МЗС зьвернецца ў МУС — тады, можа, схема спрацуе. На ўзроўні раённай міліцыі гэта даўно ўжо не працуе”.

Дарэчы, апошнім часам на некалькіх курапацкіх камянях зьявіліся абразы Маці Божай. Як кажа гісторык Ігар Кузьняцоў, гэта зрабіў мастак-рэстаўратар Анатоль Кузьняцоў. Яго майстэрня знаходзіцца недалёка ад Курапатаў у прыходзе храму Ўваскрасеньня Хрыстова.

Дадаць камэнтар

Камэнтары