Горацкія ўлады патрабуюць ад кандыдатаў узгадненьня зьместу агітацыйных улётак

21.12.2006.

Сябра Горацкай акруговой выбарчай камісіі, супрацоўніца райвыканкаму Кацярына Кароткіна заявіла кандыдату ў дэпутаты абласнога Савету Андрэю Юркову, што аплата за друк яго агітацыйных улётак будзе зробленая толькі пасьля таго, як узор улёткі будзе прадастаўлены ў райвыканкам на ўзгадненьне. Паводле іншых дэмакратычных кандыдатаў, зарэгістраваных ў рэгіёне, аналягічныя патрабаваньні былі прад’яўленыя і да іх агітацыйнай прадукцыі. Дарэчы, перад пачаткам цырымоніі ўручэньня пасьведчаньняў тая ж Кацярына Кароткіна спрабавала не дапусьціць у залю горацкага журналіста Эдуарда Брокарава, спасылаючыся на тое, што “яго не запрашалі”, і нават пагражала выклікам міліцыі. Калі ж сп.Брокараў сам зьвярнуўся да супрацоўніка РАУС, які таксама прыйшоў за кандыдацкім пасьведчаньнем, спн. Кароткіна некуды сыйшла. Пасьля гэтага журналіст безь перашкодаў змог прайсьці ў залю і прысутнічаць на цырымоніі, паведаміла прэс-служба Асамблеі НДА.