ААН разгледзіць скаргу на забарону пікетаў за свабоду Алеся Бяляцкага

2012 2012-09-03T12:05:31+0300 1970-01-01T03:00:00+0300 be http://spring96.org/files/images/sources/paplauny-sudalienka.jpg Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»
Праваабаронцы Анатоль Паплаўны і Леанід Судаленка

Праваабаронцы Анатоль Паплаўны і Леанід Судаленка

Гомельскія праваабаронцы Анатоль Паплаўны і Леанід Судаленка 1 верасня атрымалі з Камітэту ААН па правах чалавека паведамленне аб тым, што іх скаргі на забарону у абласным цэнтры пікетаў, прымеркаваных да арышту Алеся Бяляцкага, кіраўніка ПЦ “Вясна” і віцэ-прэзідэнта Міжнароднай федэрацыі за правы чалавека (FIDH), прынятыя Камітэтам да разгляду. Пра гэта паведамляе сайт "Гомельскай вясны"

Паводле атрыманых карэспандэнцыяў, скаргі праваабаронцаў зарэгістраваныя і накіраваны ўраду Беларусі для выказвання афіцыйнай пазыцыі беларускага боку адносна парушэнняў правоў, пра якія гаворыцца ў скаргах.  

Нагадаем, што 4 жніўня 2011 года, у дзень арышту Алеся Бяляцкага, праваабаронцы звярнуліся ў Гомельскі гарвыканкам па дазвол на правядзенне ў абласным цэнтры серыі пікетаў з мэтай прыцягнення ўвагі грамадскасці на палітычны арышт і змяшчэнне пад варту свайго калегі. Гарадскія ўлады пікеты не дазволілі. Усе суды (раённы, абласны, Вярхоўны), дзе абскардзілі гэтае рашэнне праваабаронцы, сталі на бок уладаў.

У скарзе ў Камітэт па правах чалавека ААН заяўнікі звяртаюць увагу, што ў амаль 500-тысячным горадзе Гомелі ўлады вызначылі толькі адно месца для правядзення пікетаў і мітынгаў, а за правядзенне мірных сходаў грамадзяне, згодна з рашэннем гарвыканкама, павінны яшчэ і заплаціць - міліцыі, хуткай дапамозе і камунальным службам. Анатоль Паплаўны і Леанід Судаленка лічаць, што Беларусь не выконвае свае міжнародныя абавязацельствы, паколькі нацыянальны закон «Аб масавых мерапрыемствах» утрымлівае двухсэнсоўныя і расплывістыя нормы, якія могуць трактавацца і тлумачыцца па-рознаму.

- У тым выпадку, калі б мы прытрымліваліся літары нацыянальнага закона аб мірных сходах, а таксама сталі выконваць рашэнне мясцовых уладаў аб правядзенні мірных сходаў грамадзян у адзіным вызначаным месцы правядзення масавых мерапрыемстваў у горадзе Гомелі, правядзенне планаваных з нашага боку мірных сходаў губляла б ўсялякі сэнс, паколькі асноўнай іх мэтай з'яўлялася прыцягненне ўвагі грамадскасці да палітычнага арышту вядомага праваабаронцы. Які сэнс у правядзенні такога мерапрыемства ў малалюдным мікрараёне на ўскраіне горада! - заявіў Леанід Судаленка.

- Мы разлічвалі на тое, што скарга будзе зарэгістраваная ў ААН. Такім чынам, у гадавіну арышту нашага калегі Алеся Бяляцкага мы яшчэ раз нагадваем міжнароднай супольнасці і пра палітычны  пераслед, і пра фактычнае табу на выказванне свайго меркавання і на мірныя сходы ў Беларусі, - падвёў рысу Анатоль Паплаўны.

Праваабаронцы просяць Камітэт ААН па правах чалавека не толькі ўстанавіць факт парушэння іх правоў з боку дзяржавы, але таксама рэкамендаваць беларускаму ўраду прывесці нацыянальнае заканадаўства аб масавых мерапрыемствах у адпаведнасць з міжнароднымі абавязацельствамі.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international