Студэнту, адлічанаму з Горацкай акадэміі, адмоўлена ў рэгістрацыі кандыдатам у дэпутаты

Былы студэнт БДСГА Аляксандар Страчук атрымаў адмову ў рэгістрацыі кандыдатам у дэпутаты Горацкага раённага Савету дэпутатаў. Фармальнай нагодай для гэтага стала нібыта неадпаведнасьць зьвестак пра сябе, якія прэтэндэнт (у той час – студэнт БДСГА) падаў у камісію яшчэ напрыканцы кастрычніка, падчас рэгістрацыі ініцыятыўнай групы. Выключанымі з акадэміі Аляксандар, а таксама сябра яго ініцыятыўнай групы Дзяніс Сарокін сталі толькі 28 лістапада, пасьля таго, як адміністрацыя ВНУ даведалася аб вылучэньні. Прэтэндэнт, дарэчы, адразу ж падаў скаргу ў камісію, дзе паведаміў аб прымусовым зьмяненьні свайго статуса і патрабаваў прыняцця мераў, каб спыніць перасьлед актыўных студэнтаў. Пры разглядзе пытаньня аб рэгістрацыі сябры камісіі чамусьці не зьвярнулі ўвагу на гэтае паедамленьне. Увогуле ж, з васьмі кандыдацкіх мандатаў, на якія прэтэндавалі сябры Горацкай дэмакратычнай кааліцыі, атрыманыя чатыры, але тры з іх – па ключавых акругах, дзе будуць выбірацца дэпутаты абласнога Савету, паведаміла прэс-служба Асамблеі НДА.