БХК патрабуе правесьці праверку фактаў фальсіфікацыі прэзідэнцкіх выбараў у Беларусі

2006 2006-11-28T10:00:00+0200 1970-01-01T03:00:00+0300 be Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

У сувязі з заявай Аляксандра Лукашэнкі аб тым, што апошнія прэзідэнцкія выбары былі сфальсіфікаваныя, РГА “Беларускі Хельсінкскі камітэт” (БХК) лічыць неабходным правядзенне поўнага і галоснага расследавання кампетэнтнымі органамі і прыцягнення вінаватых да адказнасці. Аб гэтым гаворыцца ў распаўсюджанай заяве прэс-службы БХК. “З заявы А.Лукашэнкі выцякае, што ён асабіста паўплываў на скажэнне вынікаў галасавання, што пацвярджаюць высновы БХК па выніках незалежнага назірання за выбарамі прэзідэнта Рэспублікі Беларусь”, – адзначае прэс-служба БХК.

Разам з тым, канстатуюць у праваабарончай арганізацыі, “матываваная скарга БХК аб прызнанні выбараў несапраўднымі была пакінутая без задавальнення Цэнтральнай камісіяй Рэспублікі Беларусь па выбарах і правядзенню рэспубліканскіх рэферэндумаў”. Вярхоўны суд, куды БХК звярнуўся са скаргай аб адмене пастановы ЦВК як пазапраўнай і прызнанне выбараў несапраўднымі, таксама адмовіў ва ўзбуджэнні справы.

“Усё гэта сведчыць аб наўмысным характары дзейнасці службовых асоб, якія падпадаюць пад прыкметы саставаў злачынстваў, прадугледжаных артыкуламі 191, 192, часткі 3 артыкула 426 Крымінальнага кодэкса, – гаворыцца ў заяве. – Разам з гэтым незалежна ад вынікаў пракурорскага рэагавання на неабходнасць узбуджэння крымінальнай справы пытанне аб легітымнасці знаходжання А.Лукашэнкі на пасадзе прэўідэнта Рэспублікі Беларусь пастаўленае пад сумненне”.

Нагадаем, 23 лістапада падчас прэс-канферэнцыі Лукашэнка заявіў украінскім журналістам, што вынікі галасавання былі сфальсіфікаваныя ў карысць ягоных апанентаў. “Апошнія выбары мы сфальсіфікавалі, я ўжо заходнікам гэта казаў, – сказаў ён. – За прэзідэнта Лукашэнку прагаласавала 93,5 працэнтаў. Гавораць, гэта не еўрапейскі паказчык. Мы зрабілі 86. Гэта праўда было. І калі зараз пачаць пералічваць бюлетэні, то я не ведаю, што з імі рабіць наогул. Да выбараў нам гаварылі, што калі будуць прыкладна еўрапейскія паказчыкі на выбарах, то мы вашыя выбары прызнаем. Мы збіраліся зрабіць еўрапейскія паказчыкі. Але таксама, бачыце, не атрымалася”.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international