Слонімская міліцыя цікавіцца асобамі, якія прыйшлі на Дзень памяці Неманцэвіча з бел-чырвона-белымі сцягамі
У Слоніме 8 траўня адбыліся Дні памяці мучаніцкага подзвігу Апостальскага грэка-каталіцкага Экзарха Беларусі Антона Неманцэвіча і ягонай паствы на тэрыторыі Палесся і Гродзеншчыны. У малітоўным успаміне прыняў удзел сакратар Кангрэгацыі па справах Усходніх Касцёлаў арцыбіскуп Кірыл Васіль.
На ўрачыстасці ў Слоніме сабраліся сотні вернікаў. Урачыстасці адбыліся ў мікрараёне Альбярцін Слоніма ў касцёле Каралевы Міра, а таксама ў цэнтры горада ў касцёле Святога Андрэя. Некалькі вернікаў на ўрачыстасць прыйшлі з бел-чырвона-белымі сцягамі. Але ніхто іх з мерапрыемстваў не выганяў і не папярэджваў. Толькі пасля ўсяго супрацоўнікі Слонімскага РАУС зацікавіліся асобамі, якія трымалі сцяг падчас Дня памяці беларускага Экзарха. Аказалася, што гэтыя вернікі памянуць Антона Неманцэвіча прыехалі з іншых гарадоў.
