Салігорскі лесапарк будуць рубіць
Да такой высновы прыйшлі актывісты кампаніі “Абаронім лес”, атрымаўшы афіцыйныя адказы Салігорскай інспекцыі прыродных рэсурсаў ды мясцовага райвыканкаму на свае запыты па праблеме высечкі ландшафтна-рэкрэацыйных зонаў гораду.
Інфармацыя пра чарговыя намеры па высечцы салігорскага леспарку з’явілася яшчэ напрыканцы сакавіка. Абаронцы лесу адразу пачалі біць трывогу - звяртацца па дапамогу ў незалежныя СМІ ды накіроўваць скаргі ў разнастайныя дзяржорганы. Зрэшты, адказы чыноўнікаў літаральна дублявалі адзін аднаго.
Салігорскі выканкам ухіліўся ад прамога адказу на пытанне, ці плануецца далейшая высечка адзначанай рэкрэацыйнай зоны пад будаўніцтва чарговага шматпавярховіка ў зялёным трохкутніку на скрыжаванні вуліц Заслонава і Казлова, ды праігнараваў патрабаванне актывістаў аб правядзенні грамадскага абмеркавання палітыкі мясцовых уладаў у галіне горадабудаўніцтва. Чыноўнікі ў чарговы раз нагадалі, што мінулая высечка лесу была зроблена на законнай падставе і пасля заканчэння будаўніцтва будуць праведзены кампенсацыйныя высадкі кустоў і дрэў.
У адказе начальніка Салігорскай прыродаахоўнай інспекцыі А. Г. Гарнішэўскага слова ў слова паўтараецца выканкамаўскі тэкст. Галоўны ахоўнік прыроды, аднак, у канцы свайго ліста прагаварыўся і фактычна пацвердіў, што будаўніцтва дургога шматпавярохвага дома і, адпаведна, высечка ландшафтна-рэкрэацыйныай зоны плануецца.
Актывісты кампаніі “Абаронім лес” заявілі, што ў выпадку новай высечкі салігорскага лесапарку будуць звяртацца ў рэспубліканскія праваахоўныя органы і даводіць разбіральніцтва да крымінальнай справы.
