Журналіст Радыё Рацыя выкліканы ў пракуратуру
Брэсцкі карэспандэнт Радыё Рацыя Зміцер Кісель раніцай 13 сакавіка атрымаў позву ў абласную пракуратуру.
Акрамя таго, што журналісту прынеслі гэтую позву на хатні адрас, Зміцеру пазней патэлефанавалі з гэтай структуры. Чалавек, які прадставіўся пракурорам аддзела па нагляду за выкананнем заканадаўства і законнасцю прававых актаў Алегам Леванчуком, пацікавіўся, ці атрымаў карэспандэнт позву і ці разумее, навошта яго выклікаюць у пракуратуру.
З гэтай тэлефоннай размовы Зміцер Кісель даведаўся, што ў гэтай установе азнаёміліся з некаторымі тэкстамі журналіста, якія змешчаны ў Інтэрнэце, у якіх нібыты знойдзены парушэнні заканадаўства. Таксама Кісялю хочуць задаць пытанні, якія тычыцца выканання ім журналісцкай дзейнасці. Дарэчы, раней яго ўжо выклікалі яго за працу журналістам бенз акрэдытацыі. Візіт у пракуратуру прызначаны на 19 сакавіка.
