Галадоўка берасьцейскіх прадпрымальнікаў была не дарэмнай
У Беларусі адменены рэспубліканскі збор за выкарыстаньне ў прадпрымальніцкай дзейнасьці транспартных сродкаў, паведамляе Радыё Свабода. 13 верасьня Аляксандар Лукашэнка падпісаў указ № 569, які скасоўвае патрабаваньні ягонага указу №140 ад 22 сакавіка 2004 году.
Любоў Разановіч, адна з удзельніц галадоўкі ўладальнікаў і вадзіцеляў маршрутных таксі ў Берасьці, заявіла, што справядлівасьць адноўленая дзякуючы паведамленьням пра іх акцыю пратэсту ў СМІ: “Гэта, на мой погляд, стала вызначальным у скасаваньні прэзыдэнцкага ўказу”.
Любоў Разановіч з калегамі галадалі некалькі тыдняў у ліпені і жніўні гэтага году, яны дамагаліся скасаваньня рэспубліканскага збору.
Уладальнікі маршрутных таксі ў Берасьце атрымалі ліцэнзію на прадпрымальніцкую дзейнасьць задоўга да ўступленьня ў сілу указа №140 ад 22 сакавіка 2004 году. Але на пачатку гэтага году прадпрымальнікі атрымалі рахункі на аплату рэспубліканскага збору, пеняў і штрафаў агулам на 80 мільёнаў рублёў”.
