У Гомелі спецназ затрымаў дэмакратычных актывістаў, якія віншавалі мінакоў з Днём абаронцы Айчыны

23 лютага ў абедзенны час тры дэмакратычныя актывісты Гомеля выйшлі да цэнтральнага ўнівермагу горада, каб павіншаваць мінакоў з Днём абаронцы Айчыны. Кастусь Жукоўскі, Андрэй Папоў і Зміцер Карашкоў раздавалі паштоўкі з пажаданнямі: «Хопіць піць - час сям'ю карміць і краіну бараніць».

Літаральна праз дзве хвіліны пасля пачатку акцыі да актывістаў падышлі супрацоўнікі спецназу, схапілі маладзёнаў і павялі ў невядомым накірунку.

Таксама інцыдэнт адбыўся з незалежнай журналісткай Ларысай Шчыраковай. Мужчына ў штацкім падышоў да яе і пачаў чапляцца: маўляў, давайце пазнаёмімся – і такім чынам перашкаджаў здымаць затрыманне актывістаў на відэа. Калегі журналісткі пачалі заступацца за дзяўчыну, дзякуючы гэтаму, магчыма, яна не была затрымана.