«Предпринимательскую газету» папярэдзілі за зьмену тэматыкі і адрасу рэдакцыі. Пра канфіскацыю часткі накладу іх супольнага выпуску з «Белорусской деловой газетой» Мінінфарм ня ведае.

Менскія гарадзкая ды абласная міліцыі заяўляюць, што ў апэратыўных зводках паведамленьняў пра канфіскацыю 1600 асобнікаў “Предпринимательской газеты” няма. Яшчэ адзін партнэр “БДГ” — штотыднёвік “Салідарнасць” ня можа надрукаваць чарговы нумар і чакае вынікаў праверкі Камітэту дзяржкантролю.

Дагэтуль, праз суткі пасьля падзеі, застаецца загадкай, хто ажыцьцявіў канфіскацыю дзясятай часткі накладу супольнага нумару “Предпринимательской газеты” і “БДГ”. Рэдакцыі абодвух выданьняў высьветліць гэта ня здолелі, хаця і зьвярталіся ў розныя органы МУС.

Паводле Радыё Свабода