Старшыня Еўрапарламента заклікаў вызваліць Каваленку
Старшыня Еўрапейскага парламента Марцін Шульц заклікаў вызваліць актывіста Кансерватыўна-Хрысціянскай Партыі БНФ Сяргея Каваленку, які трымае галадоўку. Шульц абмяркоўваў сітуацыю ў Беларусі падчас сустрэчы з еўракамісарам Штэфанам Фюле.
Гаворыць прэс-сакратар старшыні Еўрапейскага парламента Марцін Граеўскі:
- Доўгатэрміновая галадоўка актывіста апазіцыі Сяргея Каваленкі добра паказвае, як у Беларусі парушаюцца прынцыпы дэмакратыі і закона. Жыццё Каваленкі знаходзіцца пад пагрозай з-за галадоўкі, у сувязі з гэтым старшыня Шульц заклікаў беларускія ўлады да тэрміновага вызвалення Каваленкі і прадастаўленні яму медычнай дапамогі. Спадар Шульц сёння падкрэсліў, што ўлады будуць мець кроў на руках у выпадку калі ён памрэ.
Старшыня Еўрапейскага парламента паўтарыў заклік вызваліць і рэабілітаваць усіх палітычных зняволеных, у тым ліку двух былых кандыдатаў у прэзідэнты Мікалая Статкевіча і Андрэя Саннікава, праваабаронцу Алеся Бяляцкага, апазіцыйных актывістаў Дзмітрыя Бандарэнку, Мікалая Аўтуховіча, Дзмітрыя Дашкевіча ды іншых.
У заяве таксама змешчаны зварот да прэзідэнта Лукашэнкі, аб памілаванні Уладзіслава Кавалёва і Дзмітрыя Канавалава, якія чакаюць смяротнага пакарання.
