Гарадзенскую журналістку выклікаюць у КДБ

Гарадзенскую журналістку Гражыну Шалкевіч выклікаюць у гарадзенскае абласное ўпраўленне КДБ. Афіцыйную позву ёй хацелі перадаць яшчэ ў суботу ўвечары, але журналісткі не было дома. У нядзелю каля 14-й гадзіне ў кватэру Шалкевіч прыйшоў міліцыянт з позвай на 18-ю гадзіну гэтага ж дня. Чаму такая пільнасць спатрэбілася ў выходны нядзельны дзень, журналістцы не патлумачылі. Гражына Шалкевіч адмовілася ісці на гэты час і з тае прычыны, што ёй не было з кім пакідаць малое дзіця. Тады прадстаўнік міліцыі патэлефанаваў ва ўпраўленне КДБ і выклік перанеслі на панядзелак 30 студзеня на 8.30 раніцы.

Гражына Шалкевіч мяркуе, што такая ўвага з боку спецслужбаў да яе асобы выклікана верагодна альбо яе журналісцкімі матэрыяламі на Беларускім Радыё Рацыя альбо частай прысутнасцю на выязных паседжаннях і сустрэчах на Гарадзеншчыне актывістаў непрызнанага дагэтуль Саюзу палякаў Беларусі.

Гражына Шалкевіч мяркуе для абароны сваіх правоў заключыць дамову з адвакатам.