Новая порцыя бруду ў раёнках
Раённыя выданні Міншчыны ў чарговы раз узгадалі апазіцыю, незалежныя СМІ і Алеся Бяляцкага. У “Нясвіжскіх навінах” і ўздзенскай “Чырвонай зорцы” адначасова быў надрукаваны артыкул “Апошняя восень іржавай апазіцыі” за подпісам Юрыя Шаўчукова, а ў “Бярэзінскай панараме” – ананімныя “Страшылкі ад “аўтарытэтных” экспертаў”. Абодва твора проста перанасычаны здзеклівымі і абразлівымі выразамі ў адрас “альтэрнатыўнага палітычнага асяроддзя”.
Артыкул “Апошняя восень іржавай апазіцыі” распавядае пра няўдалыя спробы апазіцыі арганізаваць масавыя акцыі пратэсту, у прыватнасці – “Народны сход”, на які быццам прыходзілі толькі замежныя рэпарцёры, самі арганізатары і супрацоўнікі сілавых структураў у цывільным.
Дасталося тут таксама і Алесю Бяляцкаму, які быццам прагарэў за фінансавыя махінацыі, а вынік працы яго калег – “усё тыя ж лозунгі і заклікі, у аб’ектыўнасць якіх ужо не верыць нават інтэрнэт”.
“Страшылкі ад “аўтарытэтных” экспертаў” прысвечаны новаму закону аб КДБ.
Ананімны аўтар спрабуе запэўніць чытачоў у беспадстаўнасці абурэння незалежных СМІ гэтым дакументам. Ён сцвярджае, што новыя нормы не павялічваюць паўнамоцтвы супрацоўнікаў дзяржбяспекі, а наадварот – накіраваныя на ўзмацненне правоў асобы, і з падобным законам Беларусь “спакойна жыве ўжо шмат гадоў”. А апазіцыйныя выданні з гэтай нагоды папросту “праехалі па вушах” даверлівых беларусаў” і “з пэўным поспехам адпрацавалі задачу па запалохванню”.
Такім чынам, дзяржаўная прэса не грэбуе ніякімі сродкамі, каб у чарговы раз пераканаць чытача ў беспрынцыповасці, беспадстаўнасці цяперашняй альтэрнатывы ўладзе, “што ўжо даўно даказала гісторыя”.
