У Маладэчне адзначылі Дзень правоў чалавека пад наглядам міліцыі (фота)
Нягледзячы на афіцыйную забарону ў правядзенні пікета, маладзечанскі праваабронца Эдуард Баланчук усё ж адзначыў Дзень правоў чалавека. У самым шматлюдным месцы горада, на Цэнтральнай плошчы, Эдуард распавядаў мінакам пра свята і раздаваў тэматычную літаратуру.
Па назіраннях, людзі гэта ўспрымалі добразычліва, выказвалі падзяку, некаторыя казалі, што вельмі паважаюць Эдуарда і такіх як ён.
Мерапрыемства не абыйшлося і без супрацоўнікаў праваахоўных органаў. Міліцыянты праверылі дакументы і прагледзелі брашуры па правах чалавека, якія раздаваў Эдуард. Відавочна, ніякай крамолы адразу яны не ўгледзелі, таму адыйшлі, каб параіцца з начальствам. Эдуард тым часам раздаў усе матэрыялы і зайшоў у суседнюю кавярню, з акна якой назіраў за міліцыянтамі. Было падобна на тое, што тыя пасля тэлефонных кансультацыяў усё ж вярнуліся за праваабаронцам, таму што доўга хадзілі па плошчы і азіраліся. Але ўсё абыйшлося, праз некаторы час Эдуард спакойна сыйшоў.
