Адвакат Андрэя Саннікава абскардзіла адмову ў сустрэчы са сваім падабаронным

Адвакат экс-кандыдата ў Прэзідэнта Андрэя Саннікава Марына Кавалеўская абскардзіла ў пракуратуры Магілёўскай вобласці і Дэпартаменце выканання пакаранняў Магілёва і Магілёўскай вобласці адмову начальніка турмы №4 Аляксандра Ламазы ў сустрэчы са сваім падабаронным.

Нагадаем, што сёння зранку стала вядома, што Андрэй Саннікаў знаходзіцца ў Магілёўскай турме №4. Адвакат напісала заяву з просьбай даць дазвол на сустрэчу, аднак атрымала адмову – начальнік калоніі спадар Ламаза спаслаўся на тое, што Андрэй Саннікаў з’яўляецца транзітна-перасыльным зняволеным, і ў сувязі з гэтым адмаўляе ў сустрэчы.

Адвакат Марына Кавалеўская адзначае, што падставаў для адмовы ў сустрэчы не было.

“Раней Андрэй Саннікаў ужо знаходзіўся ў Магілёўскай турме №4 у якасці “транзітнага перасыльнага” і ніякіх перашкодаў падчас шматразовых сустрэчаў і аказанні юрыдычнай дапамогі адвакатам не чынілася. Сённяшняя адмова выклікае абурэнне. Лічу, што адмова ў сустрэчы з маім падабаронным з’яўляецца грубейшым парушэннем”, - гаворыць Марына Kавалеўская.