Працэс Філіпа Кірдуна працягнецца 16 лістапада а 9-й раніцы
Сёньня працягнуўся разгляд адміністратыўнай справы ў дачыненьні верніка Філіпа Кірдуна, якога вінавацяць у нецэнзурнай лаянцы падчас працэдуры дактыласкапіі. Былі дапытаныя 3 супрацоўнікаў міліцыі, якія сцьвярджалі, што спадар Кірдун пачаў лаяцца пасьля правядзеньня працэдуры дактыласкапіі.
Міліцыянты Андрэй Мельнічэнка і Аляксандр Бірчанка цьвердзілі, што Філіп Кірдун звяртаўся да іх “халуі лукашэнкаўскія”. Супрацоўніца міліцыі Святлана Куніцкая, якая загадвае працэдурай дактыласкапіі ў гарадскім аддзеле міліцыі Фрунзенскага раёну, заявіла, што 14 лістапада ў дзяжурную частку прыходзілі родныя абвінавачанага і пагражалі ёй.
Працяг разгляду справы – заўтра, а 9-й гадзіне раніцы.
Працэс у судзе Фрунзенскага раёна Менска распачаўся 14 лістапада. Суддзя Людміла Лапо пагадзілася дапытаць міліцыянтаў Аляксандра Бірчанку і Сяргея Доўнара, якія бралі ў Філіпа Кірдуна адбіткі пальцаў. Вернік заяўляе пра ўжываньне супраць яго катаваньняў.
Абвінавачаны зьвярнуўся з адкрытым лістом да прэзідэнта Беларусі , у якім падкрэсьліў, што супраць яго ўжываўся гвалт. Апроч таго, у лісьце Філіп Кірдун падкрсэьліў, што міліцыянты наўмысна спрабуюць надаць справе палітычную афарбоўку, каб прыхаваць свае супрацьзаконныя дзеяньні.
