У кватэры Максіма Губарэвіча праведзены ператрус
Бліжэй да вечара 10 лістапада ў кватэры падазраванага па крымінальнай справа сябра сойму Партыі БНФ гарадзенца Максіма Губарэвіча, дзе ён прапісаны ў бацькоў, быў праведзены ператрус. Самога Максіма ў гэты час дома не было. Пакуль ён прыехаў, ператрус фактычна закончыўся. Нічога пры тым забрана не было. Максім Губарэвіч лічыць, што па той абсурднай справе, якая заведзена на яго і двух паплечнікаў па партыі – Алеся Каліту і Сяржука Семянюка яшчэ ў жніўні (нібыта за збіццё службовага ахоўніка ранейшага мінскага офіса партыі) ператруса ў яго дома і быць не магло. Таму адназначна такія дзеянні супрацоўнікаў следства і міліцыі можна расцэньваць як псіхалагічны ціск. Нагадаем, што ператрусы па месцах жыхарства Каліты і Семенюка прайшлі значна раней.
