Апошняга фігуранта справы аб "масавых беспарадках" пакінулі на волі
Святаслаў Барановіч
У судзе Маскоўскага раёна Мінска завяршыўся працэс Святаслава Барановіча, якога суддзя Алена Рудніцкая прызнала вінаватым ва ўдзеле ў “масавых беспарадках” і асудзіла да трох гадоў абмежавання волі без накіравання ў месцы адбывання пакарання. Гэта меньш, чым прадугледжвае мінімальная санкцыя за дадзенае злачынства.
Менавіта такое пакаранне прасіў для абвінавачанага пракурор Серакоў. У якасці меры стрымання Святаславу Барановічу абрана падпіска аб нявыяздзе. Сёння ў часе паседжання былі дапытаныя яшчэ 9 міліцыянтаў, якія праходзілі па справе ў якасці пацярпелых. Як і 10 іх калегаў, якія давалі паказанні 28 верасня, міліцыянты казалі, што не памятаюць Святаслава Барановіча і прэтэнзіяў да яго ня маюць.
Судовы працэс распачаўся 29 жніўня. Па справе праходзіла 30 пацярпелых супрацоўнікаў праваахоўных органаў, але толькі 12 з іх з’явіліся на першае паседжанне. У выніку суддзя перанесла працэс на 28 верасня.
Святаслаў Барановіч з 15 чэрвеня ўтрымліваўся пад вартай у СІЗА № 1 на Валадарскага. 29 жніўня мера стрымання была змененая на падпіску аб нявыяздзе.
