Лісты ад Алеся Бяляцкага больш не даходзяць да сяброў і блізкіх
Родныя і сябры зьняволенага старшыні Праваабарончага цэнтру Вясна” Алеся Бяляцкага перасталі атрымліваць ад яго паштовую карэспандэнцыю. Жонка Наталля, напрыклад, атрымала апошні ліст ад мужа, які быў датаваны 20 верасьнем. Нехта з сяброў Алеся не атрымаў адказу на 3 і нават болей лістоў. Супрацоўнікі ПЦ “Вясна” не ўпэўненыя нават у тым, ці атрымлівае сам Бяляцкі карэспандэнцыю з волі.
Праваабаронца Валянцін Стэфановіч не хавае сваёй заклапочанасьці і выказвае трывогу, што для Бяляцкага ў СІЗА створаная адмысловая інфармацыйная блакада. Асабліва гэта непакоіць цяпер, калі неўзабаве будзе прызначаная дата суду і праваабаронцу патрэбна маральная падтрымка і салідарнасьць калег і сяброў.
Калі бліжэйшымі днямі час сітуацыя з затрымкай лістоў не зьменіцца, праваабаронцы будуць рабіць захады для вырашэньня гэтай незразумелай праблемы і ў першую чаргу звернуцца з запытам да начальніка Мінскага СІЗА №1, дзе больш за два месяцы ўтрымліваецца пад вартай Алесь Бяляцкі.
