У Магілёўскім СІЗА пацвердзілі, што Андрэй Саннікаў знаходзіцца ў іх
У Магілёўскім СІЗА пацвердзілі, што Андрэй Саннікаў знаходзіцца ў іх
Экс-кандыдат у прэзідэнты Беларусі Андрэй Саннікаў сапраўды знаходзіцца ў следчым ізалятары № 4 Магілёва. Пра гэта БелаПАН паведамілі ў СІЗА.
Сёння магілёўскае СІЗА наведалі мясцовыя дэмакратычныя актывісты грамадзянскіх кампаній "Наш дом" і "Еўрапейская Беларусь" Крысціна Шацікава і Томас Якавіцкі.
Паводле слоў дзяжурнага СІЗА, паколькі Саннікаў "транзітны перасыльны", яму забаронены якія-небудзь перадачы. Таксама ён паведаміў, што сустрэч з адвакатам у транзітных перасыльных не бывае, "паколькі іх справы запячатаныя і не распячатваюцца".
Паводле слоў дзяжурнага, стан здароўя Саннікава "нармальны", таму што зняволеных не пераводзяць, калі ім патрабуецца якая-небудзь медыцынская дапамога.
У той жа час у СІЗА не паведамілі, колькі часу Саннікаў будзе знаходзіцца ў Магілёве і куды яго затым перавядуць.
Як паведамлялася раней, 21 верасня жонка Саннікава Ірына Халіп атрымала тэлеграму ад начальніка наваполацкай калоніі, дзе адбываў пакаранне яе муж. У тэлеграме паведамлялася, што Саннікава 20 верасня этапавалі ў папраўчую калонію № 2 Бабруйска. Аб прычынах пераводу зняволенага нічога не гаварылася.
14 мая суд Партызанскага раёна Мінска прыгаварыў Саннікава да пяці гадоў пазбаўлення волі з адбываннем пакарання ў калоніі ўзмоцненага рэжыму. Экс-кандыдат у прэзідэнты прызнаны вінаватым у арганізацыі масавых беспарадкаў.
