Заклікі да вызвалення Алеся Бяляцкага сёння зноў прагучалі ў ААН

20 верасня Міжнародная Федэрацыя за правы чалавека і Фундацыя дамоў правоў чалавека правялі паралельнае мерапрыемства на тэму крымінальнага пераследу віцэ-прэзідэнта Федэрацыі і старшыні Праваабарончага цэнтру “Вясна” Алеся Бяляцкага, арыштаванага 4 жніўня 2011 г. Мерапрыемства выклікала вялікую зацікаўленасць у прысутных, у тым ліку прадстаўнікоў шэрагу нацыянальных прадстаўніцтваў у ААН. Прысутным быў прадэманстраваны кароткаметражны фільм, прысвечаны Алесю Бяляцкаму, а затым перад імі выступіў намеснік старшыні “Вясны” Валянцін Стэфановіч і дырэктар Беларускага Дому правоў чалавека ў Вільні Ганна Герасімава.

Пасля прэзентацыяў слова ўзяў кіраўнік місіі Еўразвязу пры Радзе па правах чалавека ААН Дзімітры Іліополос (Dimitris N. Iliopoulos). Сп. амбасадар у прыватнасці адзначыў, што крымінальны пераслед вядомага ў Беларусі і па-за яе межамі праваабаронцы Алеся Бяляцкага з’яўляецца нічым іншым як палітычным пераследам, і заклікаў афіцыйны Менск да неадкладнага вызвалення праваабаронцы, а таксама ўсіх палітычных вязняў Беларусі. Яго пазіцыя была падтрыманая прадстаўнікамі нацыянальных дэлегацыяў шэрагу краінаў Еўразвязу: Польшчы, Венгрыі, Германіі. Прадстаўніца міжнароднай праваабарончай арганізацыі Amnesty International адзначыла, што Алесь Бяляцкі з’яўляецца вязнем сумлення, і заклікала спыніць пераслед беларускіх праваабаронцаў.