Заўтра ў Мазыры суд за запіс на старонцы “ВКонтакте”
Плошча Леніна ў Мазыры
На 4 жніўня ў судзе Мазырскага раёна прызначаны разгляд адміністратыўнай справы працоўнага завода меліярацыйных машын Міхала Караткевіча. Ён на сваёй старонцы “ВКонтакте” для ўласнага карыстання змясціў інфармацыю пра сустрэчы на пл. Леніна ў Мазыры штосераду а 19-й гадзіне. За гэта ў РАУСе на яго склалі пратакол па артыкуле “Парушэнне парадку арганізацыі альбо правядзення масавага мерапрыемства альбо пікетавання”. Судовае паседжанне заўтра пачнецца а 12-ай гадзіне ў пакоі 306, паведамляе “Гомельская вясна”.
Спадар Караткевіч змясціў інфармацыю з раскладам сустрэчаў на пл. Леніна як памятку для сябе. Але начальнік ААПП Мазырскага РАУС падпалкоўнік міліцыі С.П. Кадол угледзеў у гэта інфармацыі парушэнне Адміністратыўнага кодэкса. 11 ліпеня ён выклікаў Караткевіча на допыт, дзе склаў на яго пратакол аб адміністратыўным парушэнні па ч.1 арт. 23.34 КаАП РБ.
Спадар Караткевіч абвінавачваецца ў тым, што “в интернет сети на сайте “Вконтакте” путем переадресации распространил призыв о необходимости собираться каждую среду недели в 19-00 на пл. им. Ленина г. Мозыря, тем самым осуществил организацию массового мероприятия, нарушая установленный порядок проведения массовых мероприятий”. Чым адрозніваецца “размясціць” і “распаўсюдзіць” падпалкоўнік Кадол растлумачыць “правапарушальніку” не здолеў. Таксама назваць сведкаў ці асобаў, якія атрымалі гэтую інфармацыю, і паведаміць, як яны ёй скарысталіся, міліцыянт не здолеў.
На працягу чэрвеня-ліпеня Міхал Караткевіч чатыры разы затрымліваўся з сябрамі супрацоўнікамі Мазырскага РАУС. У яго былі ўзяты адбіткі пальцаў, сфатаграфаваны, зроблены дагляд асабістых рэчаў без панятых і складання адпаведных пратаколаў. На яго аказваўся ціск і па месцы працы: выклікалі ў ідэалагічны аддзел прадпрыемства, дзе прапанавалі напісаць заяву на звальненне па асабістым жаданні.
Па фактах пераследу з боку супрацоўнікаў Мазырскага РАУС і па месцы працы Міхал Караткевіч накіраваў адпаведную заяву на імя пракурора Сушчынскага В.В.
Спадар Караткевіч спадзяецца на справядлівы, незалежны і бесстаронні судовы разгляд адміністратыўнай справы 4 ліпеня і забеспячэнне яго канстытуцыйных правоў на адпачынак, перамяшчэнне па горадзе, сустрэчу з сябрамі ў любы час і ў любым не забароненым мясцовымі ўладамі месцы, у тым ліку і на плошчы Леніна горада Мазыра.
