"Залатому ільву" адмовілі ў рэгістрацыі
Гарадзенскі абласны
суд не задаволіў скаргу слонімскіх
актывістаў да абласнога ўпраўленьня
юстыцыі, якое адмовіла ў рэгістрацыі
грамадзкага аб’яднаньня "Залаты
леў".
Гарадзенскі абласны суд
абгрунтаваў сваё рашэньне тым, што ў
статуце грамадзкага аб’яднаньня няма
нормы пра парадак абскарджваньня
рашэньняў кіроўных органаў
аб’яднаньня.
Праўда, у першым
статуце, які адмовіліся рэгістраваць
ва ўпраўленьні юстыцыі летась, гэта
фармулёўка была, і той самы Гарадзенскі
абласны суд прызнаў статут добрым.
Пазьней гэтая частка статуту ня выклікала
пярэчаньняў і ў Вярхоўным судзе.
Праваабаронца
Юры Чавусаў, які прысутнічаў на паседжаньні
суду, зазначыў: склалася вельмі дзіўная
прававая сытуацыя, бо тое, што паўтара
года таму было законным, а заканадаўства
за гэты час не зьмянялася, цяпер абласны
суд прызнае незаконным. Таму пры
абскарджваньні ў Вярхоўным судзе справа
будзе мець пэрспэктыву.
"Можна
будзе пакласьці побач два ідэнтычныя
статуты зь невялічкімі зьменамі і два
рашэньні суду, дзе адна і тая ж норма
статуту трактуецца абсалютна па-рознаму.
І гэта відавочнае парушэньне прынцыпу
аднолькавага выкананьня заканадаўства".
