МЗС Беларусі адмовіў у акрэдытацыі расійскаму журналісту Лашманкіну

Паводле слоў прэс-сакратара МЗС Беларусі Андрэя Савіных , гэта зроблена за парушэнне расійскім журналістам заканадаўства Беларусі.

МЗС Беларусі адмовіў у акрэдытацыі галоўнаму рэдактару расійскага праваабарончага інфармагенцтва Свабода Аляксандру Лашманкіну, нягледзячы на раней прынятае станоўчае рашэнне па гэтым пытанні, паведамляе БелаПАН.
Прэс-сакратар МЗС Беларусі Андрэй Савіных пацвердзіў інфармацыю пра тое, што Лашманкін пазбаўлены акрэдытацыі. Паводле яго слоў, гэта зроблена за парушэнне расійскім журналістам заканадаўства Беларусі.
Нагадаем, журналіст і праваабаронца планаваў асвятляць святкаванне апазіцыяй у Мінску Дня Волі, аднак ён быў высаджаны ў Оршы з цягніка ў ноч з 23 на 24 сакавіка. Прычынай для затрымання стаў ананімны званок, пра тое, што Лашманкін спрабуе правезці наркотыкі.
24 сакавіка суддзя Аршанскага суда прызнала журналіста вінаватым у дробным хуліганстве. З міліцэйскага пратакола вынікала, што пры затрыманні Лашманкін размахваў рукамі і нецэнзурна лаяўся. Адразу пасля вынясення прыгавору Лашманкін абвясціў галадоўку пратэсту.
Зараз Лашманкін знаходзіцца ў Беларусі і вырашае, што яму рабіць далей.
"Улады Беларусі не хочуць, каб у краіне працавалі незалежныя журналісты, каб праўдзівая інфармацыя пра тое, што адбываецца, распаўсюджвалася за яе межы. Парушаць правы чалавека заўсёды больш цікава, калі пра гэта ніхто не ведае", — сказаў Лашманкін.