Раман Бясьсмертны: Украіну турбуе сытуацыя з правамі чалавека ў Беларусі

Украіна занепакоеная сытуацыяй з правамі чалавека ў Беларусі і падзяляе ацэнку Эўрапейскага Зьвязу па тым падзеям, якія адбыліся ў Менску 19 снежня, заявіў амбасадар Украіны ў Менску Раман Бясьсмертны.

"Украіну вельмі турбуе сытуацыя з правамі чалавека. Наша краіна паставіла перад сабою мэту стаць сябрам Эўразьвязу. Таму ацэнка стану правоў чалавека ў Беларусі, асабліва падчас падзеяў 19 снежня 2010 гады, у нас супадае з ацэнкай Эўрапейскага зьвязу", - адзначыў Бясьсмертны.

Разам з тым “Украіна і Рэспубліка Беларусь -- дзяржавы-суседзі, у нас тысяча кілямэтраў сумеснай мяжы, якая, дарэчы, да сёньня не дэмаркіраваная, агульная шматвяковая гісторыя. Зыходзячы з гэтых матываў мы, натуральна, не можам падтрымліваць абсалютную ізаляцыю і будзем працягваць эканамічнае супрацоўніцтва”.

"Беларусь знаходзіцца ў цэнтры Эўропы і таму мы павінны разумець, што выкарыстаньне вызначаных санкцый нанясе ўдар і па правах беларускіх грамадзянаў", - адзначыў дыплямат.

Бясьсмертны таксама заявіў, што "на другі дзень пасьля арыштаў на плошчы ў беларускіх СМІ прагучала інфармацыя аб нейкіх "турыстах", якія ў канцы лістапада мінулага года, нібыта завезьлі ў Беларусь з тэрыторыі Украіны электрошокеры, дымавыя шашкі, дубінкі, касьцеты, нажы і патроны".

"Адпаведная нота была накіравана ў МЗС Беларусі. Аднак, амаль два месяца няма адказу на гэты запыт. Украінскі бок да гэтага часу не валодае інфармацыяй на аснове якіх фактаў рабіліся такія заявы", - заявіў амбасадар Украіны Раман Бясьсмертны ў інтэрвію Інтэфаксу.