У Магілёве прадстаўнікі апазіцыі скардзяцца ў суд на КДБ

Актывісты Салаўёў і Шамбалова просяць, каб суд адмяніў вынесеныя ім папярэджанні, пастаноўку на прафілактычны ўлік, абавязаў супрацоўнікаў КДБ прынесці ім выбачэнні.

Старшыня Магілёўскай абласной арганізацыі Партыі БНФ Зміцер Салаўёў і актывістка аргкамітэта па стварэнні партыі "Беларуская хрысціянская дэмакратыя" Таццяна Шамбалова падалі ў суд Ленінскага раёна скаргі на Упраўленне КДБ па Магілёўскай вобласці, якое паставіла іх на прафілактычны ўлік, паведамляе БелаПАН.

Нагадаем, Зміцер Салаўёў быў пастаўлены на прафілактычны ўлік 5 студзеня. Як адзначана ў афіцыйным папярэджанні, на ўлік яго паставілі за неаднаразовыя спробы арганізацыі і правядзення ў рэгіёне несанкцыянаваных масавых мерапрыемстваў, якія маглі пацягнуць грубіянскае парушэнне грамадскага парадку. А таксама за ўдзел 19 снежня ў Мінску ў несанкцыянаваным мерапрыемстве, у выніку якога былі дапушчаны масавыя беспарадкі.

Таццяна Шамбалова была пастаўлена на прафілактычны ўлік 9 лютага. Ёй было ўручана афіцыйнае папярэджанне за дзейнасць у складзе незарэгістраванай ва ўстаноўленым парадку партыі "Беларуская хрысціянская дэмакратыя" і ўдзел у Плошчы

Паводле скаргі Салаўёва, падчас прафілактычнай гутаркі з супрацоўнікам КДБ Андрэем Махуновым у якасці доказаў супрацьпраўнай дзейнасці былі прыведзены факты ўскладання Салаўёвым кветак у абласнога краязнаўчага музея 25 сакавіка, і у помніка ахвярам Чарнобыля 26 красавіка і ўдзел у падрыхтоўцы абласной кааліцыяй дэмакратычных сіл праграмы імпрэзы Дня Волі.

Салаўёў настойвае, што пры правядзенні гэтых мерапрыемстваў не было ніякіх грубіянскіх парушэнняў грамадскага парадку. Сваё знаходжанне на плjixs Незалежнасці ў Менску 19 снежня ён тлумачыць выкананнем прафесійных абавязкаў як карэспандэнта інтэрнэт-выдання "Вольны Магілёў".

Таццяна Шамбалова ў сваю чаргу сцвярджае, што супрацоўнік КДБ Андрэй Махунов беспадстаўна назваў яе "кіраўніком гарадскога аддзялення партыі "БХД". "Гэтыя сцвярджэнні не адпавядаюць рэчаіснасці і з'яўляюцца неабгрунтаванымі і лжывымі выдумкамі і здагадкамі, бо такой партыі ў Рэспубліцы Беларусь не існуе. У рэчаіснасці я з'яўляюся магілёўскім каардынатарам арганізацыйнага камітэта па стварэнні партыі "БХД" і яе заснавальнікам і таму займаюся дзейнасцю па падрыхтоўцы яе рэгістрацыі, як прадугледжана законам "Пра палітычныя партыі", у прыватнасці артыкулам 10", — адзначае Шамбалова.