Бублікавай - позва “да запатрабавання”
Журналістка Таццяна Бублікава позву ў Генеральную пракуратуры атрымае "да запатрабавання" на Мінскім Галоўпаштамце.
Намеснік начальніка аддзелу па наглядзе за выкананнем правоў і свабод грамадзян Генеральнай пракуратуры РБ саветнік юстыцыі Павел Елісееў патэлефанаваў Таццяне і запрасіў яе на размову з нагоды «праверкі», што мела адбыцца 21 лютага. Тады журналістка запатрабавала, каб ёй выслалі дакумент па месцы рэгістрацыі, у Гомель. Тацяна Бублікава знаходзілася там некалькі дзён, але дагэтуль нічога не атрымала.
- Калі не адбылася наша першая сустрэча ён мне патэлефанаваў сам і мы дамаўляліся, як і куды мне гэтую позву перадаць. Мы ўсё думалі-думалі і я прапанавала выслаць на Галоўпаштампт, я прыйду і там “да запатрабавання” атрымаю вашу дакументацыю. І той начальнік падумаў, крыху збянтэжыўся : маўляў як гэта позва “да запатрабавання”. Мне нават самой смешна стала, але прыйдзецца спадзявацца на маю чэснасць. Прыйду і атрымаю, чэснае слова, спадар начальнік. Вось такая сюрэалістычная сітуацыя.
Таццяна Бублікава адбыла 10-суткавы арышт па абвінавачанні ва ўдзеле ў несанкцыянаванай акцыі 19 снежня. Таццяна рабіла рэпартаж з плошчы Незалежнасці, маючы пасведчанне польскай кампаніі «N.E.W. S. Informacje».
