Наста Палажанка на свабодзе
Сёньня ўвечары зь ізалятару КДБ выпусьцілі намесьніцу
старшыні “Маладога фронту” 20-цігадовую Насту Палажанку. Яна дала сьледчым
падпіску аб нявыезьдзе.
Наста распавяла “Свабодзе”, што не мае права разгалошваць падрабязнасьці сваёй
крымінальнай справы, дэталі свайго знаходжаньня ў “амэрыканцы” яна апісвае
неахвотна:
“ Усё ў парадку. Мне не было на што скардзіцца. Я больш турбавалася не за сябе,
а за сяброў на волі і ў суседніх камэрах”.
Наста падкрэсьліла, што ёй невядомая лёгіка, паводле якой кагосьці выпускаюць
пад падпіску аб нявыезьдзе, а кагосьці пакідаюць у СІЗА.
Наста кажа, што на волі ў яе шмат спраў, яна хоча найперш даведацца, у якім
стане яе сябры і арганізацыя.
Насту Палажанку арыштавалі 20 снежня і трымалі ў сьледчым ізалятары КДБ.
Праваабарончая арганізацыя «Міжнародная амністыя» прызнала яе вязьнем
сумленьня.
Наста Палажанка — госьця «Начной Свабоды» ад 22-й гадзіны.
