Эдуарду Лобаву ў Жодзінскай турме прагражалі расправай
Эдуарда Лобава, які 18 сьнежня быў затрыманы па падазрэньні ў здзяйсненьні хуліганскіх дзеяньняў у адпаведнасьці з узбуджанай крымінальнай справай па ч. 3 арт.339 КК, спрабавалі дапытаць у Жодзінскай турме №8.
Як стала вядома маці Эдуарда, 13 студзеня яго выклікалі да двух супрацоўнікаў, адзін з якіх прадставіўся аператыўнікам КДБ, аднак прозвішча назваць адмовіўся. Іх найперш цікавілі ўзаемастасункі актывіста з “Маладым фронтам”. Калі Лобаў адмовіўся даваць паказаньні, яму прыгразілі пераводам у іншую камеру турмы і фізічнай расправай.
Зміцеру Дашкевічу і Эдуарду Лобаву 6 студзеня было прад’яўленае абвінавачаньне па ч. 3 арт.339 Крымінальнага Кодэксу РБ. Яны ўтрымліваюцца ў Жодзіскай турме №8.
Па версіі следства, Дашкевіч і Лобаў з хуліганскіх падахвочваньняў беспадстаўна і наўмысна, кулакамі і металічным абцугамі зьбілі двух грамадзян.
