Старшыняў участковых камісій у Мінску вучаць па-рознаму
Так лічыць назіральнік ад грамадскага аб'яднання "БНФ "Адраджэньне" Валянціна Свяцкая пасля праведзенага семінара-трэнінгу для старшыняў участковых камісій Ленінскага раёна ў будынку сярэдняй школы № 64.
Гэты семінар-трэнінг стаў, па меркаванні назіральніка, поўнай супрацьлегласцю аналагічнаму семінару-трэнінгу, праведзенаму ў Маскоўскім раёне сталіцы:
"На апошнім старшыні ўчастковых камісій фактычна атрымалі заданне сфармаваць брыгады "правільных" назіральнікаў, якіх вучылі, як супрацьстаяць занадта цікаўным журналістам і назіральнікам пры падліку галасоў на тым ці іншым участку, па магчымасці нейтралізаваць асабісты пункт гледжання назіральнікаў і такім чынам засведчыць чарговую "элегантную" перамогу. Таму гэты семінар-трэнінг і семінар-трэнінг у Ленінскім раёне - неба і зямля ".
Праводзіў трэнінг начальнік аддзела арганізацыйна-прававой работы адміністрацыі Ленінскага раёна Павел Піскуноў, які вучыў прысутных, як трэба правільна запаўняць пратаколы падліку галасоў папярэдняга галасавання, а таксама выніковыя пратаколы, як правільна падпісваюцца бюлетэні для галасавання. Увогуле, на семінары-трэнінгу цалкам на канкрэтных прыкладах "раскладвалася па палічках" нядаўна прынятая пастанова Цэнтральнай выбарчай камісіі № 99 ад 5 лістапада гэтага года, у якофй змяшчаюцца рэкамендацыі па правядзенні выбараў.
На думку Валянціны Свяцкай, вучоба ў рамках дадзенага семінара-трэнінгу праходзіла граматна і добразычліва:
"На гэтым семінары я прысутнічала адна ў якасці назіральніка, але не адчула нейкага негатыўнага стаўлення да сабе. Больш таго, Павел Піскуноў спрабаваў мяне актыўна ўключыць у вучобу, запытваў маё меркаванне, да прыкладу, па працэдуры падліку галасоў, на што я яму сказала: галоўнае ў гэтым працэсе – сябры выбарчых камісій не павінны дэманстраваць назіральнікам свае спіны і тое, што ніжэй спіны, і што ім не трэба хаваць бюлетэні, якія павінны падлічвацца публічна ".
В. Свяцкую моцна здзівіла заява-прапанова Паўла Піскунова аб магчымасці выкарыстання празрыстых скрыняў для галасавання на асобных участках, калі на іх старшыні ўчастковых камісій знойдуць грошы.
У канцы трэнінгу Піскуноў пацікавіўся ў назіральніцы, ці ёсць у яе пытанні. На што Валянціна Свяцкая адказала: «Да Вас у мяне пытанняў няма». Размаўляў з ёй Піскуноў выключна на беларускай мове.
Дарэчы, у будынку школы ўжо аформлена памяшканне класа ў якасці выбарчага ўчастку. Справа за малым - пачакаць таго, як будзе праходзіць непасрэдна галасаванне на гэтым участку, і як тут будуць падлічваць галасы выбаршчыкаў.
"Праваабаронцы за свабодныя выбары"
