Слуцк: На сустрэчы Кастусёва з выбаршчыкамі правакацый не было

Прынамсі такое меркаванне выказаў пасля сустрэчы са случчанамі, якая адбылася 27 лістапада ў гарадскім Доме культуры, сам кандыдат. Рыгору Кастусёву не задавалі пытанняў прадстаўнікі БРСМ і прыўладных структураў, як гэта адбывалася на папярэдняй сустрэчы з Саннікавым.

Людзей на сустрэчу з Рыгорам Кастусёвым прыйшло няшмат – каля 30 чалавек. Як адзначыла, звяртаючыся да кандыдата, грамадская актывістка Зінаіда Цімошак, “народ, які не прыходзіць на сустрэчы з кандыдатамі, не пойдзе і на плошчу”.  Затое ў залі прысутнічалі намеснік старшыні Слуцкага райвыканкама па ідэалогіі Пётр Даўгучыц і начальнік аддзела ідэалогіі райвыканкама Ларыса Дабравольская. Пазнаёміцца з кандыдатам прышлі назіральнікі АБСЕ  і журналісты рэгіянальнай газеты “Інфа-Кур’ер”.

Мерапрыемства доўжылася дзве гадзіны, на працягу якіх кандыдат адказаў на шэраг пытанняў. Расказваючы пра сваю праграму, Кастусёў звычайна ўжываў слова “мы”, а не “я”, спасылаючыся на партыю БНФ. Случчан цікавілі розныя моманты. У прыватнасці, пыталіся пра тое, што будзе з кандыдатам пасля таго, як скончыцца маскарад пад назвай “выбары” ці як ён паступіць з тымі, хто на працягу апошніх гадоў ствараў на тэлебачанні ілюзію шчасця, напрыклад, з вядучым праграмы “Контуры”.

“Праваабаронцы за свабодныя выбары”