Баранавічы: Сустрэцца з Раманчуком прыйшлі сябры БРСМ, “Белай Русі” і “Беларускага саюза афіцэраў”
26 лістапада ў Баранавічах у зале цэнтра ідэалагічнай і культурна-масавай работы Заходняга аператыўна-тактычнага камандавання ваенна-паветраных сіл і супрацьпаветранай абароны адбылася сустрэча выбаршчыкаў з кандыдатам у прэзідэнты Яраславам Раманчуком. На ёй прысутнічала каля 100 чалавек, пры гэтым большую палову складалі сябры БРСМ, “Белай Русі” і “Беларускага саюза афіцэраў”, якія паводзілі сябе вельмі шумна і агрэсіўна.
Пасля працяглага выступлення Яраслава Раманчука пачалася дыскусія ў форме пытанняў і адказаў. Прадстаўнікі праўладных грамадскіх арганізацый не столькі задавалі пытанні, сколькі казалі пра дрэннае жыццё ў Літве, Польшчы і асабліва ва Ўкраіне і распавядалі пра выдатнае сацыяльна-эканамічнае становішча ў Беларусі. Нягледзячы на правакацыйныя дзеянні некаторых асобаў, Яраслаў Раманчук аргументавана адказваў на іх “пытанні”.
На сустрэчы прысутнічаў супрацоўнік гарвыканкама Валер Пузікаў і вельмі адчувалася кіруючая рука ідэалагічнага аддзела.
“Праваабаронцы за свабодныя выбары”
Фота: Яраслаў Раманчук размаўляе з выбаршчыкамі горада Баранавічы.
