Мітынг у грамадскай прыёмнай Лукашэнкі

2010 2010-11-19T15:09:00+0200 1970-01-01T03:00:00+0300 be

У грамадскай прыёмнай кандыдата ў прэзідэнты Аляксандра Лукашэнкі, якая сёння адчынілася ў Мінску, у былым Доме літаратара (Фрунзе, 5) адбыўся стыхійны мітынг.

А 8-й раніцы туды прыйшло больш за паўсотні чалавек з скаргамі на несправядлівыя рашэнні судоў, чыноўніцкае самаўпраўства і іншымі праблемамі. Людзі прыехалі з усёй краіны, яны патрабавалі сустрэчы з кандыдатам Лукашэнкам.

Былі і транспаранты. «Господин президент, когда будет задержана кореличская банда, убившая мою несовершеннолетнюю дочь!» — такі плакат трымаў адзін з удзельнікаў.

У прыёмнай відавочна не чакалі такога ажыятажу. «Вам каго таварышы? Вы па якім пытанні?» — пытае малады чалавек на ўваходзе. Адказваем, што прыйшлі пабачыць працу адчыненай сёння грамадскай прыёмнай. Малады чалавек супакойваецца. У фае некалькі дзясяткаў чалавек, пераважна жанчыны сталага веку. Некаторыя з іх раней былі заўважаныя на акцыях групы жанчын — сваячак асуджаных, а таксама не згодных з рашэннямі судоў.

Да просьбітаў выйшаў сябра ініцыятыўнай групы Лукашэнкі Васіль Казак і паведаміў, што асабістага прыёму не будзе.

У адказ наведнікі прыёмнай склалі заяву, у якой запатрабавалі паведаміць, калі ў дзе адбудзецца сустрэча з кандыдатам А. Лукашэнкам, а таксама патлумачыць прычыну адмовы сустрэцца з імі асабіста. Заяву падпісалі 34 чалавекі.

Яшчэ раніцай каля 70 чалавек падпісалі калектыўную заяву, у якой выказалі пратэст супраць беззаконня з боку чыноўнікаў, суддзяў і работнікаў праваахоўных органаў.

Заявы былі перададзеныя ў прыёмную.

«Нас з’яднала бяда», — кажа Лілія Уварава з Гомеля, якая дабіваецца перагляду справы свайго сына. Паводле словаў жанчыны, усе гэтыя людзі пазнаёміліся ў чэргах у дзяржаўныя установы, дзе спрабавалі дабіцца праўды: падтрымлівалі адно аднаго, дапамагалі складаць скаргі.

«Я прыехаў з Брэста, а ён з Гомеля. А ўсё чаму? Бо паўсюль беззаконне і падман», — кажа мужчына. Ягоны калега з Гомеля працягвае: «І самае крыўднае, што гэта ўсё сыходзіць ад судовых органаў і пракуратуры — тых, хто мусіць бараніць нашы інтарэсы».

Валер Маліноўскі з Рэчыцы прапануе прагуляцца да ягонага аўто. Ён праходзіць па крымінальнай справе ў якасці пацярпелага, з ягонай гісторыяй азнаёмілася каля сарака суддзяў, а рашэння ад 2007 года так і няма. Бярэ ў салоне легкавіка канверт, паказвае.

«Два гады хаджу па судах, страшэнна стаміўся. Але паўсюль адны адпіскі ды фармальнасць. Нібы не людзі, а нейкія робаты».

Валер шэсць месяцаў спрабуе трапіць на прыём да старшыні Вярхоўнага суда Валянціна Сукалы: «Па тэлефоне званю цэлы дзень — не здымаюць, а потым возьмуць слухаўку ды скажуць, што на сёння прыём заяў скончыўся. Добра, прыехаў сам. Зайшоў у прыёмную, напісаў заяву. Вярнуўся ў Рэчыцу і неўзабаве прыходзіць адказ — у прыёме заявы адмоўлена, бо ў ёй не ўказаная нагода для сустрэчы з суддзёй».

«Мы патрабуем толькі асабістай сустрэчы з Лукашэнкам! Хіба ён не бачыць, што робяць ягоныя падначаленыя, суддзі і пракуроры?» Людзі заявілі, што застануцца ў грамадскай прыёмнай кандыдата да яе закрыцця.

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international