Затрыманьні за распаўсюд “Народнай волі” з праграмай Аляксандра Мілінкевіча адбыліся ў Віцебску
26 лютага, сем прадстаўнікоў моладзевых арганізацыяў і ініцыятываў выйшлі на вуліцы Віцебска, каб распаўсюдзіць паасобнікі “Народнай волі” з праграмай Аляксандра Мілінкевіча. Неўзабаве двое ўдзельнікаў акцыі апынуліся ў міліцыі.
Дзяніс Дзянісаў і Максім Волкаў былі дастаўленыя ў Кастрычніцкі РАУС. Праз тры гадзіны іх адпусьцілі. Як паведаміў нашаму парталу адзін зь лідэраў віцебскага моладзевага руху Віталь Броўка, міліцыянты не знайшлі, за што можна прычапіцца да затрыманых. Аднак 415 адзінак газэты засталіся ў пастарунку “да высьвятленьня абставінаў”.
Перасьлед распаўсюднікаў недзяржаўнай прэсы — не адзінкавы выпадак ціску на дзеячаў віцебскіх дэмакратычных сілаў. Напрыклад, увечары 22 лютага на прасьпэкце Будаўнікоў за расклейку анонсаў агітацыйнай кампаніі Мілінкевіча былі затрыманыя яшчэ два моладзевыя актывісты, паведаміла прэс-служба Асамблеі НДА.
