Светлагорск: У абслугоўванні пікета “Белай Русі” задзейнічаны мікрааўтобус

2010 2010-10-19T09:08:33+0300 1970-01-01T03:00:00+0300 be http://spring96.org/files/images/sources/svetlagorsk-podpisy-kastyse.gif Праваабарончы цэнтр «ВЯСНА» Праваабарончы цэнтр «ВЯСНА»
Праваабарончы цэнтр «ВЯСНА»

У Светлагорску подпісы за апазіцыйных кандыдатаў шпарка збіраюць, седзячы на плоце, пікеты за А. Лукашэнку абслугоўвае мікрааўтобус.

Пікеты за вылучэнне кандыдатам у Прэзідэнты Уладзіміра Някляева распачаліся ў горадзе 15 кастрычніка. А на выходных днях да іх далучыліся і пікеты прыхільнікаў Рыгора Кастусёва.

Нядзеля. Непадалёк ад гарадскога цэнтру – рынак па продажу сельгаспрадукцыі. Можна і не заўважыць, што побач праводзяцца пікеты па збору подпісаў за Р. Кастусёва і Ул. Някляева: тут ні сцягоў, ні іншых бачных здалёк атрыбутаў. Святлана Міхальчанка, якая збірае подпісы за Ул. Някляева, прысела проста на агароджу, зборшчык подпісаў за Р. Кастусёва Вадзім Болбас прынёс з сабой маленькі зэдлік.

Біяграфія пра паэта Някляева, які «дзяцінства правёў у знакавым месцы беларускай гісторыі» – толькі на рускай мове. Чаму?

– Вы мяне пра гэта пытаеце? – кажа Святлана Міхальчанка, якая каардынуе ініцыятыўную групу Някляева ў Светлагорскім раёне. – Што даслалі нам з цэнтру, тое і наклеілі на стэнд.

У пікеце за Р. Кастусёва усё па-беларуску. Але стэнд такі нізенькі, што прачытаць біяграфію намесніка старшыні Партыі БНФ можна хіба што на карачках. Нягледзячы на сціплыя ўмовы, збор подпісаў за абодвух кандыдатаў ідзе даволі шпарка.

– За гадзіну падпісаліся дзесяць выбаршчыкаў, – падлічвае па падпісным лісце Вадзім Болбас. – Асабліва спяшацца не даводзіцца, бо трэба па кожнаму запісаць звесткі без памылак.

«У нас адзін прэзідэнт! А вось выбярыце іншага – ні пенсій, ні заробку не будуць плаціць!» – раптам залямантавала жанчына сталога веку. «І вады не будзе» – іранічна адказвае ёй мужчына побач.

Плакаты ад раённай выбарчай камісіі вісяць усюды навокал. Але па-беларуску – ніводнага плакату.

Пікет за А. Лукашэнку ў гэты дзень знаходзіўся ля універсаму ў мікрараёне № 1, дзе жывуць у асноўным пенсіянеры. Абслугоўваюцца пікеты за дзеючага прэзідэнта мікрааўтобусам «Газель», на якім падвозяць усё неабходнае. Зборшчыкі подпісаў ад арганізацыі «Белая Русь» цярпліва чакаюць электарат ва ўтульных крэслах за столікам.

У горадзе дзейнічаюць ініцыятыўныя групы і іншых прэтэндэнтаў у кандыдаты – напрыклад, Алеся Міхалевіча і Яраслава Раманчука. Іхніх пікетаў пакуль заўважана не было.

“Праваабаронцы за свабодныя выбары”

Апошнія навіны

слухаць Радыё рацыя Міжнародная федэрацыя правоў чалавека Беларуская Інтэрнэт-Бібліятэка КАМУНІКАТ Грамадзкі вэб-архіў ВЫТОКІ Антидискриминационный центр АДЦ 'Мемориал' Prava-BY.info Беларускі Праўны Партал Межрегиональная правозащитная группа - Воронеж/Черноземье
Московская Хельсинкская группа
Молодежное Правозащитное Движение
amnesty international