Гродна: Чарговыя парушэнні пры зборы подпісаў за Аляксандра Лукашэнку

У Гродне зафіксаванае чарговае парушэнне пры зборы подпісаў за Аляксандра Лукашэнку. У інтэрнаце гарадскога шпіталю №2, што знаходзіцца ў доме па вуліцы Томіна-12, вахцёры збіраюць подпісы ў  падтрымку цяперашняга кіраўніка дзяржавы проста на працоўным месцы. І тут паўстае шмат пытанняў – напрыклад, ці з’яўляюцца гэтыя вахцёры сябрамі ініцыятыўнай групы Лукашэнкі. Да таго ж, улічваючы той факт, што амаль паўсюдна па краіне сябрам ініцыятыўных групаў іншых кандыдатаў збіраць подпісы ў інтэрнатах не дазваляецца, падобныя сітуацыі можна расцаніць як стварэнне няроўных умоваў у працы зборшчыкаў подпісаў.   

А ў Скідзелі падпісацца за Аляксандра Лукашэнку на працоўным месцы прапаноўвалі лекары гарадской паліклінікі. Таксама незалежныя назіральнікі зафіксавалі ў Гродне некалькі зваротаў педыятраў пры візітах у кватэры грамадзян. Па словах людзей, лекары тлумачаць, што іх прымушаюць збіраць подпісы ў падтрымку Аляксандра Лукашэнкі і прапануюць бацькам хворых дзяцей падпісацца.

“Праваабаронцы за свабодныя выбары”