Баранавічы: Прымус у адукацыйных установах
Баранавіцкі дзяржаўны універсітэт
У Баранавічах ініцыятыўная група ў падтрымку Аляксандра Лукашэнкі пакуль не сабрала неабходнай колькасці галасоў выбаршчыкаў. Верагодна, таму 7 кастрычніка 2010 года намесніца начальніка ўпраўлення адукацыі Баранавіцкага гарвыканкама Марыя Святлакова правяла тэрміновую нараду з настаўнікамі, якія ўваходзяць у склад ініцыятыўнай групы Аляксандра Лукашэнкі. Яна ў катэгарычнай форме запатрабавала ад настаўнікаў сабраць як мінімум па 200 подпісаў за дзеючага прэзідэнта.
Не ведаючы сваіх правоў і баючыся страціць сціплае месца працы, незадаволеныя настаўнікі скардзяцца суседзям, калегам па працы, праваабаронцам, але толькі не ў пракуратуру.
Падобная сітуацыя склалася і ў Баранавіцкім дзяржаўным універсітэце. Адміністрацыя гэтай навучальнай установы заявіла вуснамі студэнцкай рады, што для ўсіх, хто падпісаўся за “не таго” кандыдата, будуць знойдзены прычыны для выключэння з універсітэта. Такімі ж метадамі адміністрацыя БарДУ дзейнічала і на папярэдніх прэзідэнцкіх выбарах.
Мясцовыя праваабаронцы збіраюць усе гэтыя факты, каб напісаць скаргу пракурору горада на неправавыя дзеянні адміністрацыі БарДУ і ўпраўлення адукацыі гарвыканкама.
“Праваабаронцы за свабодныя выбары”
