Бабруйск: Ціск на членаў ініцыятыўнай групы Віталя Рымашэўскага працягваецца
На працягу апошніх дзён да членаў ініцыятыўнай групы Віталя Рымашэўскага ў Бабруйску пачалі прыходзіць людзі, якія называюць сябе прадстаўнікамі Міністэрства юстыцыі.
- Шмат да каго ўжо прыходзілі, - распавядае Таісія Кабанчук, лідэр бабруйскай суполкі БХД. – Яны выбіраюць людзей, якія з’яўляюцца заснавальнікамі партыі і членамі ініцыятыўнай групы. Прыходзяць дахаты, просяць падпісаць нейкія анкеты. Прыходзілі ўжо дахаты да Аляксандры Сьянавай, Анастасіі Міхалап, Святланы Абрамнікавай і яшчэ некалькіх чалавек. Пры гэтым іх “абыход” яшчэ працягваецца. Нашы людзі ўжо ведаюць пра гэта і не адчыняюць дзверы.
Таісія Кабанчук паведаміла, што людзі, якія называюць сябе супрацоўнікамі Мінюста, спрабуюць запалохаць людзей, і часам гэта атрымліваецца зрабіць.
- У Бабруйскім раёне жыве жанчына, яна таксама сябра ініцыятыўнай групы і заснавальніца БХД, - працягвае распавядаць Таісія Кабанчук. - Імя яе называць не буду, але адзначу, што яна працуе ў дзяржаўнай установе. Да яе першай прыехалі гэтыя супрацоўнікі Мінюста. Пагражалі, што яна пазбавіцца працы, і пад ціскам гэтая жанчына падпісала заяву аб выхадзе з партыі і ініцыятыўнай групы…
“Праваабаронцы за свабодныя выбары”
