Гарадзеншчына: Адных вучаць, іншых не інфармуюць

Сёння, 1 кастрычніка, у Гарадзенскім аблвыканкаме намеснік старшыні Цэнтральнай Выбарчай Камісіі Мікалай Лазавік правёў навучальны семінар для старшыняў тэрытарыяльных выбарчых камісій з усёй вобласці. Невядома, пра што там ішла гутарка, але можна адзначыць, што інфармацыі, якая датычыць выбараў Прэзідэнта Рэспублікі Беларусь і адрасаваная грамадзянам, бракуе.

Прыкладам, некаторыя афіцыйныя сайты райвыканкамаў яшчэ не размясцілі на сваіх інтэрнэт-старонках складаў тэрытарыяльных выбарчых камісій. Бальшыня складаў ТВК будуць надрукаваны ў суботу, 2 кастрычніка, у абласных і раённых газетах.

А вось даведацца пра склад Гарадзенскай раённай ТВК увогуле праблематычна. Справа ў тым, што рэгіянальная газета “Перспектива” выходзіць два разы на тыдзень, прычым выпуск выдання за пятніцу ў вольны продаж не паступае, гэты нумар могуць убачыць толькі падпісчыкі. А на афіцыйным сайце Гродзенскага выканаўчага камітэту дагэтуль інфармацыі пра склад камісіі няма.  

“Праваабаронцы за свабодныя выбары”