У кватэры Паўла Батуева адбыўся вобшук
Пра гэта паведаміла Радыё Свабода Актывіст дэмакратычнага руху Павал Батуеў адсутнічаў дома ў Салігорску, і наагул у Беларусі, калі міліцыя з санкцыі пракурора аглядала кватэру. Павал Батуеў рыхтуе запыт у пракуратуру пра правамернасьць вобшуку.
Павал Батуеў фігуруе ў крымінальнай справе, узбуджанай супраць Зьмітра Касьпяровіча, якога вінавацяць у зрываньні дзяржаўнага сьцягу з будынку Менгарвыканкаму.
Зьміцер Касьпяровіч, Павал Батуеў а таксама Зьміцер Гаўрусік былі затрыманыя 17 студзеня. Зьміцер Касьпяровіч дагэтуль застаецца пад вартай як падазраваны ў злосным хуліганстве і зьнявазе дзяржаўных сымбаляў. Вось камэнтар Паўла Батуева:
Акалічнасьці вобшуку Павал Батуеў ведае са словаў свайго бацькі: “Бацька сказаў, што чалавек, які рабіў вобшук, сказаў, што ён шукае ўлёткі, і рознага кшталту літаратуру. На жаль, мой бацька ня вельмі дасьведчаны ў юрыдычных пытаньнях. Ён не запатрабаваў ані копію пратакола вобшуку, ані копію санкцыі пракурора, ані прозьвішча пракурора, які ладзіў гэты вобшук”.
Павал Батуеў спадзяецца, што запыт у пракуратуру пра правамернасьць вобшуку дазволіць высьветліць у якім статусе ён фігуруе ў справе: падазраванага ці сьведкі.
