Прапановы ў закон “Аб альтэрнатыўнай службе”
Моладзевыя актывісты з арганізацый “Маладыя дэмакраты”, “Рух будучыні”, а таксама беларускія студэнты, прадставілі свае прапановы па змесце закона “Аб альтэрнатыўнай службе”. Дакумент плануецца перадаць на разгляд у Міністэрства працы.
Кажа адзін з ініцыятараў яго стварэння – кіраўнік “Маладых дэмакратаў” Міхась Пашкевіч.
- Адразу пасля прэзентацыі мы адвязем яго ў міністэрства працы і аддадзім непасрэдна працоўнай групе. Яны чакаюць нашых прапаноў і мы іх ім перададзім. Міністар працы, Мар'яна Шчоткіна, якая ва ўрадзе адказвае непасрэдна за распрацоўку закона, яна сказала, што ў прынцыпе яны гатовы прыняць любыя прапазіцыі ад грамадскіх арганізацыяў, галоўнае каб яны былі змястоўнымі і абгрунтаваныя. Літаральна цягам апошніх двух-трох тыдняў прадстаўнікі абсалютна розных арганізацыяў, палітычных і непалітычных, праваабарончых і проста студэнты БДУ і іншых універсітэтаў, удзельнічалі ў невялікай групе, якая працуе паралельна з дзяржаўнай.
У дакуменце моладзевыя актывісты апісалі, што яны хочуць пабачыць у законе “Аб альтэрнатыўнай службе”. Іх прапановы тычацца самаго вызначэння паняцця “альтэрнатыўная служба” і ўмоваў такой альтэрнатывы. У прыватнасці, аўтары дакумента прапануюць пашырыць падставы для прахаджэння альтэрнатыўнай службы не толькі па рэлігійных матывах, але і па маральных, філасофскіх і эстэтычных.
