На пілігрымцы ў Будславе затрымалі Кастуся Шыталя
У вёсцы Будслаў Мядзельскага раёну падчас штогадовых урачыстасцяў у гонар абраза Маці Божай Будслаўскай, апякункі Беларусі, 1 ліпеня быў затрыманы актывіст БХД Кастусь Шыталь.
Адзін з лідэраў БХД Павал Севярынец паведаміў, што ў міліцыянтаў, якія прапускаюць праз турнікеты на свята, ёсць фотаздымкі людзей, якіх трэба абшукаць:
- Затрымалі на ўваходзе, у іх ёсць там фотаздымкі, і яны кажуць: вы падобны на чалавека, якога трэба затрымаць. Затрымліваюць. Абшукваюць. Штосьці адбіраюць, што палічаць патрэбным. І адпускаюць. У Кастуся Шыталя адабралі ўлёткі "Малітва за Беларусь". Там тэкст малітвы за Беларусь і заклік звяртацца да маліты за Беларусь кожную пятніцу.
Кастуся Шыталя адвялі ў пастарунак, дзе без складання пратаколу канфіскавалі 150 улётак кампаніі “Малітва за Беларусь”. Праз паўгадзіны актывіста адпусцілі.
