Канфіскацыяй партрэта Аляксандра Мілінкевіча завяршыўся збор подпісаў за ягоную кандыдатуру ў Сьвіслачы

23.01.2006.

21 студзеня ў пікеце на міні-рынку ў Свьвіслачы зьбіраў подпісы Генадзь Радзецкі. Да яго падыйшоў чалавек і пачаў распытваць пра асобу А.Мілінкевіча. Да іх далучыўся маёр міліцыі Бычак у штацкім і пачаў патрабаваць ад чалавека, які хацеў паставіць свой подпіс, пашпарт.
Праз некалькі хвілінаў падыйшлі яшчэ двое міліцыянтаў у форме. З імі былі некалькі супрацоўнікаў прадпрыемства "Мачта", якія пачалі задаваць Г.Радзецкаму правакацыйныя пытаньні. Але Г.Радзецкі адказваў, што агітацыя пачнецца толькі тады, калі Мілінкевіча зарэгіструюць кандыдатам. У гэты час адзін з міліцыянтаў пачаў усіх фатаграфаваць.

Міліцыянты зьнялі з дошкі аўтабіяграфію А.Мілінкевіча, ягоны партрэт і склалі пратакол канфіскацыі. У пратаколе было запісана, што яны канфіскавалі агітацыйныя ўлёткі. Спадар Радзецкі адмовіўся падпісваць пратакол. Вось што сказаў нашаму радыё Свабода адзін з міліцыянтаў, Дзьмітры Зотаў: "Пакуль трэба даць юрыдычную ацэнку таму ці ўтрымліваюцца тут нейкія інфармацыйныя зьвесткі агітацыйнага характару".
Гэтую ацэнку, па словах Зотава, будзе даваць пракуратура.

Дадаць камэнтар

Камэнтары