Маладафронтавец Арцём Дубскі, які выйшаў на волю, мае намер заняцца праваабарончай дзейнасцю
Раніцай 25 мая з магілёўскай калоніі № 19 вызвалены актывіст "Маладога фронту" (Чэхія) Арцём Дубскі.
Супрацоўнікі калоніі вывезлі Дубскага на службовым аўтамабілі на чыгуначны вакзал прыкладна ў 7.30, нягледзячы на тое што каля калоніі яго чакалі маці, сябры і журналісты. Прыкладна ў 8.00 ім паведамілі, што Арцём ужо вызвалены і знаходзіцца на вакзале.
Ужо на вакзале Дубскі расказаў журналістам, што раніцай яму загадалі хутка сабрацца, далі 7 тысяч рублёў і вывезлі на вакзал. Паводле слоў Арцёма, на працягу двух найбліжэйшых тыдняў ён плануе адпачыць, а затым працягне грамадскую дзейнасць. Найперш маладафронтавец мае намер заняцца аказаннем дапамогі зняволеным, чые правы парушаюцца.
Вызвалення Арцёма Дубскага патрабавалі еўрапейскія структуры, а праваабарончая арганізацыя "Міжнародная амністыя" прызнала яго ў ліку іншых удзельнікаў "справы чатырнаццаці" вязнем сумлення.
