“Гавары праўду” правядзе прэс-канферэнцыю
Учора супрацоўнікі міліцыі і спецслужбаў адначасова правявялі ў розных гарадах Беларусі больш за 40 ператрусаў у офісах грамадскіх абяднаньняў, партый, незалежных прафаюзаў і кватэрах актывістаў, якія падтрымлівалі грамадзянскую кампанію Уладзіміра Някляева “Гавары праўду”. Пад час ператрусаў канфіскоўвалася капмутарная і оргтэхніка, літаратура, грошы. Дапытана некалькі дзесяткаў чалавек.
У ізалятар часовага ўтрыманьня на трое сутак змешчаны галоўны рэдактар газеты «Товарищ» Сяргей Вазняк, міжнародны сакратар АГП Андрэй Дзмітрыеў. Быў затрыманы таксама і лідэр кампаніі “Гавары праўду” беларускі пісьменнік Уладзімір Някляеў, якога позна вечарам прывезлі ў Ленінскае РУУС на допыт, які працягнецца сёньня.
Ператрусы праводзіліся на падставе крымінальнай справы, заведзенай па ч.1 арт. 250 КК РБ: «Распаўсюд заведама ілжывай інфармацыі, альбо прымяненьне рэкламы, што ўводзяць у зман спажыўцоў адносна якасьці, колькасьці, складу, спосабу вырабу і іншых характарыстык прадукцыі (тавараў, работ, паслуг)».
Парушэньне артыкулу 250 ч.1 караецца штрафам, альбо папраўчымі работамі на тэрмін да 2 гадоў, альбо арыштам на тэрмін да 3 месяцаў, альбо абмежаваньнем волі на тэрмін да 2 гадоў.
Не выключана, што даволі абсурдны ў гэтай сітуацыі крымінальны артыкул можа быць заменены пад час сьледства на іншы, больш сур’ёзны.
Сёньня ж, у 12 гадзін на афісе партыі БНФ адбудзецца прэсавая канферэнцыя, прысвечаная апошнім падзеям вакол кампаніі “Гавары праўду”.
Валянцін Стэфановіч: Гэта маштабная акцыя, непасрэдна зьвязаная с пачаткам прэзідэнцкай кампаніі
