Адзінаму кандыдату ад апазыцыі на прэзыдэнцкія выбары Аляксандру Мілінкевічу ўлады перашкаджаюць праводзіць сустрэчы на Берасьцейшчыне
12 сьнежня пачалася паездка па Берасьцейшчыне адзінага кандыдата ад апазыцыі на прэзыдэнцкія выбары Аляксандра Мілінкевіча. Міліцыя і спэцслужбы вядуць назіраньне за дэлегацыяй.
13 сьнежня амаль на дзьве гадзіны яны затрымалі кіроўцу і мікрааўтобус, на якім дэлегацыя разам з Аляксандрам Мілінкевічам перамяшчаецца па Берасьці. Яны ўважліва агледзелі машыну і рэчы, высьвятлялі, ці ня скрадзены гэты аўтамабіль, хаця менавіта на ім дэлегацыя Мілінкевіча была ў іншых рэгіёнах. У міліцыянтаў выклікалі падазрэньне відэакасэты з мультфільмамі “Прыгажуня ў сонным лесе”, “Папялушка” ды іншымі, якія адзіны кандыдат прывёз дзіцячаму сірочаму прытулку. У райаддзеле міліцыі ўсе гэтыя касэты прагледзелі, але нічога крамольнага там не знайшлі. Пасьля гэтага кіроўцу адпусьцілі, а касэты вярнулі.
За два дні паездкі па Берасьці транспарт каманды Мілінкевіча затрымлівалі ўжо чатыры разы. Міліцыянты тлумачаць свае дзеяньні правядзеньнем апэрацыі “Нелегал”.
Літаральна за 5 хвілін да сустрэчы на прахадной берасьцейскага заводу “Сьветатрон” супрацоўнікі Дзяржаўтаінспэкцыі зноў затрымалі аўтамабіль Аляксандра Мілінкевіча. І кіроўцу, і аўтамабіль старанна правяралі супрацоўнікі ДАІ. Спадару Мілінкевічу давялося перасесьці ў іншы аўтамабіль, каб не спазьніцца на сустрэчу з рабочымі завода “Сьветатрон”.
Увечары міліцыянты сарвалі сустрэчу дэмакратычнага кандыдата з інтэлігенцыяй, якая планавалася на кватэры аднаго з мясцовых актывістаў. На сустрэчу сабраліся каля 70 чалавек. Але літаральна праз 20 хвілін прыйшлі два супрацоўнікі міліцыі і сказалі, што ім паступіў сігнал аб правядзеньні ў памяшканьні несанкцыянаванага сходу. Яны прыгразілі, што выклічуць спэцпадразьдзяленьне, і па прозьбе сп. Мілінкевіча, удзельнікі сустрэчы вымушаныя былі разысьціся. Аднак на гаспадара, кіраўніка гарадзкога штабу Зьіцера Шыманскага усё-роўна быў складзены пратакол за правядзеньне нібыта несанкцыянаванага сходу.
