Дарагія сябры!
Дарагія сябры!
Праваабаронцы Алесь Бяляцкі, Валянцін Стэфановіч і Ірына Тоўсьцік, якіх учора судзілі за правядзеньне несанкцыянаванага пікету, шчыра дзякуюць усім за аказаную падтрымку і салідарнасць.
Праваабарончы цэнтр “Вясна” віншуе ўсіх беларусаў краіны і замежжа з нашым сапраўдным нацыянальным сьвятам – Днём Волі, Днём абвяшчэньня Беларускай Народнай Рэспублікі. Гэта наша гісторыя і наш сьветлы шлях у будучыню!
Мы далучаемся да закліку згадаць у Дзень Волі пра выдатную беларускую паэтку і патрыётку Ларысу Геніюш, 100-годзьдзе з дня нараджэньня якой спаўняецца сёлета.
* * *
Толькі бой безупынны вядзецца,
Дзікуны ў наступленьне ідуць,
Аддзяляюць нам мову ад сэрцаў,
Чалавечнасьць ў народу бяруць!
Усё гладка здаецца тут зьнешне,
А, па сутнасьці, крочыць вайна,
Спадцішка забіваюць найлепшых –
Не адзін ужо сьпіць Баразна.
Йдзе вайна, ды ўжо без аўтаматаў,
І ня ліўнямі — нашая кроў.
Забіваюць, здымаюць нам варту
Чалавечых, народных правоў.
Нагадаем, што 2010 год нацыянальная грамадзкасьць краіны абвясьціла годам Ларысы Геніюш, чыя творчасьць не вывучаецца ў беларускіх школах. Жыцьцё легендарнай паэткі і мужнай жанчыны Ларысы Геніюш, якая за любоў да Беларусі была асуджаная на дваццаць пяць гадоў сталінскіх лагероў, а пасьля вызваленьня не прыняла савецкага грамадзянства, з’яўляецца духоўным узорам.
Пачынаючы ад 21 сакавіка ў “кнігарніЎгалерэі” (пр-т Незалежнасьці, 37-а) штонядзелі цягам году праводзіцца літаратурная акцыя “Геніюш верш”. У яе праграме – чытаньне і абмеркаваньне любімых твораў выбітнай беларускай паэткі. Пачатак а 15 гадзіне.
