Віцебск: пададзены першыя заявы на рэгістрацыю кандыдатаў
На цяперашні момант у Віцебскую гарадскую выбарчую камісію пададзены 9 заяваў на рэгістрацыю кандыдатаў у дэпутаты, якія вылучаюцца шляхам збору подпісаў выбаршчыкаў. Каб зарэгістраваць заяўнікоў у якасці кандыдатаў, камісіі павінны разгледзець пададзеныя дакументы на прадмет выканання неабходных фармальнасцяў, прадугледжаных Выбарчым кодэксам.
Усяго гарадская тэрытарыяльная выбарчая камісія па выбарах дэпутатаў Віцебскага гарадскога Савета дэпутатаў 26-га склікання зарэгістравала 83 ініцыятыўныя групы, якія збіраюць подпісы грамадзянаў у падтрымку асобаў, што вылучаюцца кандыдатамі ў дэпутаты.
Па вобласці было пададзена больш за 2 300 заяваў на рэгістрацыю ініцыятыўных групаў па вылучэнні прэтэндэнтаў на дэпутацкія мандаты ў Саветы ўсіх узроўняў.
Так, у акруговыя выбарчыя камісіі па выбарах дэпутатаў у Віцебскі абласны Савет дэпутатаў 26-га склікання паступала 90 заяваў на рэгістрацыю ініцыятыўных групаў. З іх 5 - ад прадстаўнікоў палітычных партыяў.
Паводле інфармацыі назіральнікаў, прадстаўніцы БСДП (Народная Грамада) было адмоўлена ў рэгістрацыі ініцыятыўнай групы з прычыны яе рэгістрацыі ў г. Менску, а не на тэрыторыі Талачынскай выбарчай акругі № 24 па выбарах дэпутатаў Віцебскі абласны Савет.
"Праваабаронцы за свабодныя выбары"
