МЗС праінфармаваў кампетэнтныя дзяржаўныя органы пра рэгістрацыю скаргі Юзэпчука ў ААН
Міністэрства замежных спраў Рэспублікі Беларусь адказала на зварот праваабаронцаў наконт рэгістрацыі ў Камітэце па правах чалавека скаргі асуджанага да смяротнага пакарання Васіля Юзепчука.
“Інфармуем, што нота Упраўлення Вярхоўнага камісара ААН па правах чалавека аб рэгістрацыі Ў Камітэце па правах чалавека індывідуальнага паведамлення ад імя Юзэпчука В.Л. накіравана кампетэнтным дзяржаўным органам”, - гаворыцца ў адказе міністэрства за подпісам Намесніка Міністра С.Ф. Алейніка.
Атрыманне ноты ад МЗС праваабаронцам ужо пацвердзіў адзін з адрасатаў – Дэпартамент выканання пакаранняў Міністэрства ўнутраных спраў Рэспублікі Беларусь.
“Даводзім да вашага ведама, што Міністэрства ўнутраных спраў Рэспублікі Беларусь праінфармаванае кампетэнтнымі органамі пра разгляд скаргі ад імя асуджанага Юзэпчука В.Л. у Камітэце па правах чалавека ААН”, - паведаміў Першы намеснік начальніка Барынкоў Ю.А.
Нагадаем, што сярод адрасатаў звароту праваабаронцаў – МЗС, МУС, Генеральная пракуратура і Адміністрацыя Прэзідэнта Рэспублікі Беларусь.
На гэтым тыдні прадстаўнікі праваабарончай супольнасці краіны накіравалі ў гэтыя дзяржаўныя органы аналагічны зварот па справе Андрэя Жука. Пра гэта паведаміў сябра Праваабврончага цэнтру “Вясна” Валянцін Стэфановіч 10 лістапада падчас прэс-канферэнцыі ў Менску.
